١ @_fa5ii

على البال خلّد ذكره الي عجزت انساه مثل ماتخلّد سيرة الطيب .. فعوله خليل يراوز خاطري لين جا بـ اقصاه وانا كان نفسي عن هوى الغيد معزوله آسرني قبل سلهام رمشه رقيق حكاه وطرحني غرامه قبل لا اكمل الجوله اقاوم ،، ولا ، مريت ، مدهاله ، ومرباه غدا الكون في عيني مثل لون مجدوله .

هداياك القديمه تلحق الهوجاس بالهوجاس وله، وأستشعرك في كل بيت وكل معزوفه بكيتك بالعيون اللي سرق منها الحنين نعاس وخلاها رهينه للسهر والليل وطيوفه بسيطات الدموع الا دموع القاسي الحسّاس حصانٍ قبل ماتنزل دموعه ينمزع جوفه دموعه من غلاها ماتركها للثرى تنداس تساقط من شموخ ولا…

طاريك ما غاب عن بالي .. و لو ثانيه مع كل حزّة صباح و كل حزّة مساء " يا فاتنه " فرحتي من غيبتك .. فانيه عشت الليالي و أنا من تحت قيد الأسى فـ الصدفه الأوّله : و الصدفه الثانيه ما شفت مثلك جميله بين كل النساء فرصة ليال الوصال " قطوفها دانيه " لا تذبحين القطوف الدانيه بـ القسى

مناديب الهبوب إللي تشلّ متونها الاخبار تعذّرها الفجوج الواسعة و يلمّها صدري افجّ لها المعابر يوم أناحرها زرار زرار هبوبٍ من لطافتها ما تقطع غفوة الكدري تجيبك في ربوع الذاكرة ياصفوة الخطّار مقاديرٍ رمت بك في طريقي وأنت ماتدري"

قطعت الرجا من يوم برق الموادع لاح وغدت كل حاجه ماتبكّي .. تبكيني على اللي برى حالي غيابه و سدي باح أكابر و أزيّف ضحكتي و البلا فيني بقى له معي صوره على البال ماتنزاح حفظها غلاه اللي جرى مع شراييني عطاني علومه كل أبوها و رحت و راح ولا طحت من عينه ولا طاح من عيني .

وأنت ياللي منزلك ما ورا حدب الضلوع تدري إنك من وراها وغيرك ما درا تمتلكني يا أطرق العود من عادك فروع قبل تغريك المدينه ويطغيك الثرا يوم عادك تكره السبت وتحب الربوع والمواجه كان مسموح والوصل جْهرا جعل تسقى ذيك الأيام سجدات وركوع رحمةٍ من رب طيبه ورب أم القرى

عسى الخطوة اللي ودّتك صوبي تجريك وأعيش الحياة اللي معك اتمناها أنا كنت أسولف لك، وهالحين أسولف فيك على ما تبي مجرى السوالف ومَرساها ولا تحسب إني لو يطوّل الجفا ناسيك أنا الليلة الأولى عجزت أتخطّاها

متى يذعذع على صدري نسيم الهبوب وارتاح من زحمة افكار القلق واهدى اي والله احن واهوجس وروحي تذوب طرقي واشوف اغتراب الروح ماله مدى واخاف من كسرة الخاطر وكسر القلوب لو لحقت الفرصه الفرصه وراحت فدى ادخل على اللّٰه من دروبٍ عليها دروب والحاجه اللي تجيني من طوارف ردى

ماقدرت أنساك يالوجه الجميل الراضي و أنت جرحك فـ الهجر مالكني بـ معروفه الجفى حكمه علينا مثل حكم القاضي لين .. ما صارت تفاصيل الجفى مآلوفه لا تقول إني عن شعور الهوى متغاضي تدري إن نفسي على يوم الوصل ملهوفه ليت عندي قدره أرجع لـ الزمان الماضي و آتأمّل في جمال الصوره المحذوفه

تجيبه ليال الشوق لا طوِّل المشوَّار وتجيبه قصايد شاعرٍ يكتب احساسه يعرفه قبل لا يعرف الشعر والشعّار وقبل لا يسرّيه الشمالي بنسناسه من دياره ارقب عِلم عسّاسّة الاخبار عساها تجيب علومه اليوم من ناسه على الريح اعرّض صدري اللي كلته النار عساها تجيني نسمة تشبه انفاسه

أحبك ولو عادت جميع الوجيه أغراب خذيتك أمان يشرد الخوف من طيبه أشوف الحياه اللي مع الناس ملح وذاب و أشوفك يقينٍ يقطع الشك و الريبه أبيع السنين اللي بدونك بـ رخص تراب وأساوم على اللحظه معاك انت باللي به❣️

كل ما جيت المداهيل في ذاك المكان تاقف الدنيا بـ عيني على بيت وممر وواحدٍ لا من ذكرته تذكرت الحنان المشاعر في غيابه على خط الفقر كل ذكرى جات منه لها فالقلب شان سامح الله كل شي على بالي خطر غايبي فرقاك دارت دوايرها الثمان وانت لا كيلٍ طفح بك ولا ضمك نظر .

ياغزالٍ علق الوسـم في قلبي وراح يحسب إني مثل ناسٍ تضيع حقوقها ما درى إني صاحي للهجاد وللصبـاح قاعد بفكري وأعرف الديار وسوقها "وان بغيت أرميه رمية عداوة كان طاح بندقي تـرمي المنايـا وانـا ما بوقـها مير أخاف من المناقيد ياظبي المـراح الفشـق وام الفشق قافلٍ صندوقهاا"

ياسيّد الليل لا غابت مصابيحه يمَّل بك انك على الهقوه ويمَّل بي و الحب ما جض منه الا مجاريحه اللي هواهم عفيف وحظهم سلبي قد تبت منه وردّتني ملاويحه وانا على جرف وادنى مايميّل بي الله معك وان حداك الوقت للطيحه تحد كل الظروف وطح على قلبي .

اتركوني ياجماعه وخلوني وحيد لين تطلع ضيقة الصدر واسلا وأهدى ماهي بلحية تعاليل وعلوم وقصيد معي همَّ لا بدا الليل مع ليلي بدى كن في صدري من حروب هارون الرشيد جايّ لضرب ابو حدين في صدري صدى دورو لي راحة مطوعِ .... قلبه سعيد من صغر سنه وهو ماسكِ درب الهدى

اسمحيلي في سبيل رضاك لا جيت استشيرك خايف اني قبل اجيب رضاك لا اجيب المطمه عن شروب الما وطعم الزاد يكفيني غديرك من نهل منه ضمى عن كل زاد وكل جمه الاكيد اللي يحبك مستحيل يحب غيرك لو يشوف اللي يشوف من العذارى ما يهمه

انتهى عمرٍ من الحب يا سرع السنين انجلا والله مدري على ويش انجلا النهايه طعمها مر و التهميش شين لو يحس المبتلي بنكسار ،، المبتلى المشاعر كنها القبر ماتاخذ ثنين واحدٍ يدله و يسلى و واحدٍ ماسلا سعد عينيّ قبل لا اكون مثل الاخرين وبري حالي يوم بدلت لبيه بـ هلا

تراخت من يديك حبال وصلك و الهجر مشدود اجي لك ضاميّ يسحب خطاه .. و قلبه يجرّه ماعاد أعرف وين القىٰ هوّاي و يومي الموعود وصلت لمرحله ما عاد اشوف - لـ ناظري قرّه - فقدتك .. ما دريت إني بصير الفاقد المفقود اشوف اشباهك توّزع فـ وجهي ، وين ما افـرّه .

يا حبيبي في سبيلك قد حرقت كروتي انت حلمٍ لو قدرت احققه حققته ما تذكرك الليال الموحشات بـ صوتي ؟ وما يذكرك الصباح بـ غاليٍ فارقته ؟ طال صبري في غيابك واستمر سْكوتي ما استوى لي عودك المبري ولا عانقته ومتلهف خاطري على ثَغرك التوتي ادري انه حلو بـ المره وانا ما ذقته !! :)

ولا زلت رغم الخوف و البعد والتشكيك اراهن على زود المحبه وكبر الشوق من الناس ومن الحظ الاقشر ومن ماضيك سرقتك وكان السارق اطيب من المسروق على كل حال البارحه مرّني طاريك تطرّق لك اللي شيب القاف والطاروق ونشدني وقلت ان المعاريف تثمر فيك مثل من يداري بالخفا جيبه المشقوق .